Dili, 11 Marsu 2022-  Diretór Eskola Ensinu Sekundária Téknika Vokasionál-Eskola Ekonomia no Komérsiu (ESTV-EEC sigla portugés), Bekora, Adérito Luis da Costa,  husu ba Ministériu Edukasaun Juventude no Desportu (MEJD) atu rekruta tán profesór tanba eskola refere profesór barak hanorin la tuir sira nia área.

“Iha ne’e ami nia profesór ne’e loloos ne’e sei aumenta, tanba kada disiplina ka kada matéria ne’e, sei presiza nafatin mestre tuir ninia área, ne’e orsida edukasaun liuliu Ministériu Edukasaun (MEJD), Ministru mak bele deside tempu ne’e atu loke vaga ruma, hafoin ema bele ba teste, hafoin bele tama,” Diretór informa, ohin (11/03), iha nia knaar-fatin Bekora, Dili.

Diretór ne’e hateten tán katak, kestaun menus profesór ne’e nia husu ba parte relevante liuliu MEJD atu bele responde lalais. Tuir Diretór ne’e  katak, ESTV-EEC iha profesór voluntáriu, maibé sira mós presiza nesesidade, tanba  ne’e eskola oferese no fasilita de’it sira-nia nesesidade ba transporte nian.

Adérito akresenta katak, parte eskola relata ona problema refere ba MEJD, maibé to’o ohin loron seidauk iha resposta.

“Beibeik ba beibeik ami  fó hatene ba Ministériu Edukasaun (MEJD), maibé to’o agora la hatene rezultadu seidauk mai, atu responde ba nesesidade ne'ebé iha, liuliu ba profesór voluntáriu ne'ebé iha,” Aderito hateten.