Dili, 16 Fevereiru 2022 – Diretór Nasionál (DN) Bombeiru, Claudio Silva, hateten katak parte Bombeiru nunka halo intervensaun tarde ba inséndiu sira ne’ebé akontese, maibé dala-barak komunidade mak hato’o informasaun tarde ba parte Bombeiru.

DN Bombeiru hato’o ida ne’e, ohin (16/2) iha nia knaar-fatin, Kaikoli, Dili, hodi responde ba komunidade balu nia krítika katak Bombeiru halo intervensaun tarde ba inséndiu ne’ebé akontese iha Manleuana foin lalais ne’e.

“Bombeiru nunka halo intervensaun tarde. Ami bazeia ba informasaun ne’ebé iha. Informasaun ne’ebé tama mai sedu ami fó apoiu imediata kedas. […] Kuandu informasaun mai sedu, ami halo kedas intervensaun. Ami la’os Maromak atu adiviña (si’ik) buat hotu no ami mós laiha liras. Situasaun iha Manleuana akontese, ahi hán liu tiha minutu 30 mak informasaun foin tama mai ami,” DN Bombeiru informa ba Timor News.

Kona-ba ekipamentu, nia hateten katak parte Bombeiru nia ekipamentu sufisiente hela hodi halo intervensaun ba inséndiu no dezastre sira ne’ebé mosu iha komunidade nia leet.

DN Bombeiru ne’e husu ba komunidade sira katak wainhira mosu inséndiu ka dezastre ruma, tenke hato’o informasaun ho lalais, sedu no klaru ba parte sentrál komunikasaun Bombeiru nian, inklui fatin akontesimentu, ka bele hato’o lalais ba parte Polísia atu nune’e ekipa Bombeiru bele halo lalais intervensaun.