Dili, 08 Outubru 2021 – Diretór Nasionál (DN) Bombeiru Timor-Leste Claudio da Silva husu ba komunidade sira katak tenke hato’o informasaun kona-ba fatin akontesimentu inséndiu ruma ba parte Bombeiru nian ho loloos no klaru atu nune’e ekipa Bombeiru bele to’o lalais iha fatin akontesimentu hodi halo asaun preventiva sira.
“Dalaruma ita-nia komunidade sira hato’o informasaun mai hateten de’it dehan katak ‘ooooh ahi hán iha Bekora’. Bekora maibé iha uitoan ne’ebé loos, ladún klaru. Tanba ne’e kuandu fó informasaun ruma tenke klaru katak iha Bekora iha dalan ida ne’e ka bairu ida hanesan ne’e, para ita ba. Sé hateten de’it dehan iha Bekora ka iha Komoro, ne’ebé difísil ita atu ba lalais to’o iha fatin ne’e, ne’e ita ba ita sei buka,” DN Bombeiru informa ba komunidade liuhosi mídia Timor News, ohin (09/10), iha nia knaar-fatin Kaikoli, Dili.
Nia akresenta katak sé la konsege informa fatin akontesimentu ruma ho klaru ba parte Bombeiru, entaun hakat de’it ba postu Polísia ne’ebé besik atu Polísia informa hela ba parte Bombeiru.
Fonte: Timor News