Dili, 27 Maiu 2021 – Diresaun Nasionál Meteorolojia no Jeofízika (DNMG sigla portugés) Timor-Leste husu ba públiku atu tau atensaun ba laloran no anin boot ne’ebé oras ne’e akontese iha fatin ne’ebé de’it, hodi evita-an hosi risku sira.
DNMG mós husu ba peskadór ka sé de’it mak hala’o atividade iha tasi-laran atu kuidadu ka tau atensaun nafatin ba laloran tasi ne’ebé boot.
“Husu ba komunidade sira iha teritóriu Timor laran hotu [...] prinsipalmente ba maluk peskadór sira atu toma atensaun ba eventuál ida ne’e, hadook-an hosi fatin risku (ai-hún boot, tasi-ibun no seluk tán) atu nune’e bele evita hosi dezastre ne’ebé ita hotu la espera,” informa ofisialmente hosi DNMG liuhosi nia boletim ohin (27/5) kona-ba kondisaun klima ne’ebé válidu to’o 29 Maiu.
DNMG mós husu ba Unidade Polísia Marítima (UPM) sira ne’ebé halo patrullamentu iha tasi kosta súl no movimentu transporte aéreo, atu nafatin tau atensaun ba eventual laloran no anin boot ne’e.
Fonte: DNMG Timor-Leste