Dili, 22 Fevereiru 2022 – Diresaun Nasionál Metereolojia no Jeofízika (sigla portugés, DNMG) Timor-Leste fó-sai previzaun tempu ba loron 22 Fevereiru 2022 hodi bolu atensaun ba populasaun katak iha posibilidade atu akontese udan iha dadeer to’o meiudia no lokalmente bele forte liu liuliu iha parte foho sira inklui mós Dili.
“Agora daudauk kalohan taka iha kuaze teritóriu, posibilidade sei kauza udan ho intensidade fraku-moderadu no lokalmente bele forte liu prinsipalmente iha parte foho sira inklui mós Dili, akompaña ho anin ho velosidade normal,” DNMG fó-sai ohin (22/2) liuhosi ninia divulgasaun ofisiál.
Previzaun ne’ebé hanesan mós ba loron ohin parte loro-kraik to’o kalan nian ne’ebé tuir DNMG esplika katak, atmosfera sei kontinua instavel ka kalohan kontinua taka no iha poténsia atu udan ho intensidade fraku-moderadu iha teritóriu Timor-Leste no iha posibilidade atu forte liu.
Parte DNMG hateten katak kondisaun klimátika ida ne’e iha poténsia atu kontinua akontese iha períodu entre 22 to’o 27 Fevereiru 2022.
Fonte: DNMG Timor-Leste