Jornalista:
Jacinto Amaral Soares
DNTT ‘LOHI’ ALDEIA MORIS FOUN KATAK ATU AUMENTA MIKROLETE 013 IHA TEMPU BADAK
Dili, 04 Fevereiru 2022 – Xefe Departamentu Rejistu Veíkulu, Diresaun Nasionál Transporte no Terestre (DNTT), Amandio do Rosário, hateten katak atu aumenta mikrolete númeru 013 presiza pedidu hosi komunidade no autoridade lokál sira atu nune’e parte DNTT bele ba halo survey ba fatin no route.
“Wainhira komunidade ne’ebe hela iha ne’eba ezije ona, mais-ou-menus liuhosi Xefe Aldeia ka Xefe Suku ruma, haruka karta ida mai iha DNTT katak fatin ida ne’e presiza duni transporte públiku ruma para komunidade sira atu asesu […] So ida ne’e mak bazeia ba sira-nia karta ne’e mai iha diresaun, ekipa ida bele ba survey fatin ne’e. So ida ne’e mak ita bele responde sira-nia nesesidade. Se ita ko’alia de’it dehan jalur 013 loke ne’e laiha faktus ida,” Amandio do Rosário hateten, ohin (03/02), iha nia knaar-fatin, Balide, Dili, nu’udar resposta ba jornalista Timor News nia pergunta kona-ba planu implementasaun mikrolete 013 ne’ebé iha 11 Agostu 2021 liuba Diretór DNTT Natalino do Rosário dehan ‘atu aumenta iha tempu badak’.
Iha momentu ne’eba Diretór DNTT dehan, ekipa halo hotu ona survey ba mikrolete 013 nia route, maibe Xefe Departamentu Rejistu Veíkulu Amandio do Rosário informa fali ohin katak DNTT seidauk halo survey.
“Deskulpa media, ha’u foin liga hela ba nia antes ita atu mai entrevista maibé nia dehan la’os survey, nia dehan (DNTT) la’o ba haree fatin. […] Ha’u telefone ba nia no nia dehan seidauk halo survey maibé ami la’o haree,” Xefe Departamentu ne’e dehan.
Maibe, iha 11 Agostu 2021 liubá Diretór DNTT Natalino do Rosário hateten ho klaru katak survey ba mikrolete 013 nia route halo hotu ona no DNTT mós rejista ona mikrolete 100 resin ne’ebé hakarak halo movimentu nu’udar mikrolete 013.
“Agora daudauk ita-nia maluk (mikrolete nia na’in) sira ne’ebé mak hato’o ona pedidu, balu direitamente mai iha DNTT, balu liuhosi ministériu ne’ebá, no pedidu (atu aumenta mikrolete 013 iha Dili) ne’ebé mak DNTT simu hamutuk 106 ka 107 hanesan ne’e. Tanba ne’e mak DNTT halo ona survey ba iha ponte foun (ponte Komoro III) ninian. Tuir planu ne’e atu tau mikrolete 013. Tanba ne’e route ne’e ami halo survey hotu ona, maibé pedidu (hosi mikrolete nia na’in sira) atu halo operasaun (ba 013) ne’ebé tama mai ne’e iha 100 resin kedas. [...] Tanba ne’e agora daudauk ami estuda hela. [...] Maibé lalais iha fulan ida ne’e nia laran bele realiza ona,” dehan Diretór DNTT iha momentu ne’ebá iha nia knaar-fatin, Dili.
Fonte: Timor News
