Oekusi, 24 Novembru 2021 – Arsebispu Metropolitana Dili, Dom Virgilio do Carmo da Silva, SDB, iha kuarta (24/11) ne’e, ofisialmente lansa fatuk dahuluk harii Igreja foun parókia Sagrado Coração de Jesus Oe-Silo, Oekusi, ne’ebé konstrui tanba hetan inisiativa no kontribuisaun sarani no kongregasaun Sosiedade Verbu Divinu (SVD) Rejiaun Timor-Leste nian.
Iha lansamentu refere Dom Virgilio hateten katak, sarani parókia Oe-Silo nesesita tebes kondisaun ne’ebé sufisiente atu halo orasaun, tanba Igreja Oe-Silo aat ona. Tanba ne’e mak autoridade igreja iha ona hanoin atu harii foun.
Bispu Dioseze Dili ne’e salienta tán katak, Governu kada tinan sempre aloka orsamentu ba instituisaun Igreja tuir konkordata ne’ebé iha, ho ida ne’e mak Igreja planeia hodi fó prioridade ba nesesidade ne’ebé importante liu, tanba Igreja sai oportunidade atu halibur ema hotu iha domin, tanba ne’e tenke kria kondisaun ne'ebé di’ak.
Inisitiva ba konstrusaun Igreja refere hosi sarani no hetan fundu orsamentu hosi kontribuisaun sarani sira nian no foti hosi kofre parókia Oe-Silo nian, inklui kongregasaun SVD Rejiaun Timor-Leste.
Fonte: ZEESM Timor-Leste