Dili, 07 Janeiru 2021 – Domingas Coa inan ida hosi oan na’in tolu (3), haktuir ohin (07/01) iha mota Komoro katak, nia buka osan liuhosi suru no peneira rai-henek iha mota Komoro durante tinan sanulu (10) ona hodi sosa hahán no nesesidade seluk tán.
Domingas esplika, dalaruma wainhira rai-henek la folin ka ema la sosa entaun sira debe de’it iha kioske hafoin selu fali se osan hosi rai-henek nian iha ona.
“Semana ida ami hetan $20 ka $30. Hanesan ami araska ne’e debe de’it kios ona […] suru rai-henek ne’e hodi sosa roupa, rinso no hahán,” nia dehan.
Domingas haktuir tán ba jornalista Timor News katak, nia mós hasoru difikuldade atu hetan osan iha tempu udan tanba impede netik nia servisu suru rai-henek.
Inan hosi oan na’in tolu ne’ebé mai hosi postu-administrativu Maubise, munisípiu Ainaru ne’e mós husu atu Governu tau-matan netik liuhosi apoiu ruma atu tulun kompleta sira-nia nesesidade balu tanba sira sobrevive ho meiu suru no peneira de’it rai-henek.
Fonte: Timor News