Dili, 16 Agostu 2021 – Reitór Universidade Nasionál Timor Lorosa’e (UNTL) João Soares Martins hateten ohin (16/8) iha nia knaar fatin, kampus UNTL sentrál, Dili, katak UNTL nia dosente balu seidauk simu vasina kontra Covid-19.
Reitór UNTL dehan, aula prezensiál reativa tiha ona hahú hosi 09 Agostu liubá maibé UNTL deside ona katak dosente ne’ebé seidauk simu vasina kontra Covid-19 sei mantéin fó aula online.
“Dosente sira mós balu (simu ona) vasina, balu seidauk (simu) vasina. Iha ami-nia reuniaun, ami deside katak dosente ne’ebé la (simu) vasina labele fó aula prezensiál, nia tenke halo gravasaun ba nia matéria ka kontinua ho aula online, ne’e para ita labele fó risku ba estudante sira,” dehan Reitór João ba jornalista Timor News.
Enkuantu ba estudante sira, nia esplika katak, tenke simu vasina pelu-menus doze ida hodi bele tuir aula prezensiál ne’ebé sei komprova ho kartaun vasinasaun. Estudante ne’ebé seidauk simu vasina sei kontinua ho aula online.
"Ne'e para enkoraja sira bele simu vasina," Reitór tenik.
Reitór hato’o mós lia-menon ba komunidade akadémika sira katak tenke simu vasina atu nune’e universidade bele hala’o atividade hotu-hotu ho normál.
Fonte: Timor News