Ainaru, 21 Marsu 2022 – Ensinu Báziku Sentrál (sigla portugés, EBC) I no II siklu Aitutu-Rina ne’ebé lokaliza iha aldeia Aitutu, suku Mulo, postu-administrativu Hatubuiliku, oras ne’e ninia kondisaun la dignu tebes hanesan fali nasaun osan laiha.

Problema ida ne’e EBC ne’ebé ho naran Sagrado Coração de Jesus Atitutu-Rina refere ninia Kordenadór Januário Cardos hato’o ba Timor News, ohin (21/3) via whatsapp, nia akresenta katak parte Governu la tau atensaun.

“Ami-nia eskola ne’e prodúz alunu barak demais ona maibé to’o agora Estadu ida nunka atu hakfodak liu ba ami-nia eskola ne’e kuitadu dalaruma udan ho anin maka’as ona ne’e ami ta’uk loos sé karik uma monu kona alunu sira. (Eskola ne’e) harii iha 2006/2007 to’o agora nafatin eskola iha uma aat,” Januário akresenta.

Nia dehan katak eskola ne’e iha sala aula lima (5) mak ho kondisaun aat tebes tanba didin de’it ho au-baluk no iha ku’ak luan barak ne’ebé halo dezde tinan 2006, no kadeira tuan sira tau direita iha rai leten. Oras ne’e estudante ativu hamutuk na’in-167 mak hala’o hela estudu iha ne’ebá.

“Estadu harii netik edifísiu sala neen (6) ba ami karik hanoin ami ne’ebé iha rurál ne’e,” nia dehan.

Aléin hosi ne’e, Januário mós hato’o problema seluk mak manorin voluntáriu balu kontinua oferese-an hodi hanorin sein saláriu mensál durante tinan sanulu (10) resin ona.

“Tau netik hanoin di’ak balu ba voluntáriu sira ne’ebé sei halerik hela ne’e,” nia husu ba Governu.