Baukau, 11 Dezembru 2021 –Ensinu Báziku Filiál (EBF) Bahasahe ho estudante ativu hamutuk na’in-94 ne’ebé lokaliza iha suku Osoala, postu-administrativu Vemasse, ninia kondisaun grave.
Koordenadór EBF Bahasahe Anacleto da Silva informa ba jornalista Timor News, ohin (10/12) iha nia knaar-fatin, Osoala katak, eskola refere ninia odamatan no janela aat hotu, estudante sira uza de’it kadeira no meza sira antigu hosi tempu UNTAET nian maibé barak mak aat ona, sala aula mós tolu de’it, no rekursu livru manuál ba manorin no alunu sira laiha.
“Kondisaun eskola ne’e nian grave. […] Liuhosi entrevista ida ne’e ha’u husu ba Governu liuliu diresaun ami nian, karik bele, atu dada estudante sira ba prosesu aprendizajen di’ak liu entaun ita tenke haree ba edifísiu eskola nian tenke di’ak no mós rekursu ba manorin sira mós tenke iha kompletu. […] Manual ba profesór no ba alunu sira mak laiha. […] Meza no kadeira sira ne’e aat mak barak liu. Kadeira ho meza labarik sira uza ne’e hosi kedas tempu UNTAET nian, to’o agora Ministériu Edukasaun seidauk fó ajudu kona-ba kadeira, armáriu ka meza ne’e sira la fó ida,” Koordenadór EBF Bahasahe informa.
Koordenadór EBF Bahasahe akresenta katak nia halo beibeik proposta kada tinan ba parte Edukasaun maibé rezultadu laiha.
Aléin hosi problema hirak ne’e, Anacleto mós hateten katak eskola refere menus tán manorin ne’ebé oras ne’e iha na’in-5 de’it, kompostu hosi permanente na’in-3 no voluntáriu na’in-2.
“Ministériu Edukasaun tenke tau mós matan ba eskola rurál sira. Labele fó atensaun ba eskola iha sidade de’it,” Anacleto dehan.
Fonte: Timor News