Dili, 22 Fevereiru 2022 - Defisiente fíziku, Eduardo Tilman, husu ba kandidatu Prezidente Repúblika (PR) ba períodu 2022-2027 na’in-16 ne’ebé tuir kalendáriu sei hala’o kampaña iha loron 02 Marsu 2022 ne’e, katak labele insulta malu maibé tenke hato’o sira-nia programa ne’ebé reflete ba povu nia moris inklui envolve mós asuntu defisiente.

“Husu ba partidu polítiku sira karik ita-boot sira ko'alia ita-boot sira-nia programa tenke envolve mós asuntu defisiente  no mós labele insulta malu, koko atu fó ita-boot sira-nia programa tinan lima nian ne’e mais ou menus ida ne'ebé mak di'ak ba povu sira, atu nune’e povu sira bele hili ita-boot sira, tanba sira-nia votu hakarak muda sira nia moris,” Eduardo hateten ba Timor News,  ohin (22/02),  iha nia knaar-fatin Lahane, Dili.

Nia akresenta tán katak, Prezidente foun ne’ebé hetan fiar hosi povu tenke realiza nia promesa ne’ebé mak hato’o iha tempu kampaña, atu nune’e povu labele lakon konfiansa.

Eduardo mós iha esperansa ba Prezidente foun ne’ebé sei mai atu aselera konvensaun  direitu ba ema ho defisiénsia nian, no akonsella mós Governu atu nune’e wainhira harii edifísiu ruma tenke asesível ba defisiente sira.

“Husu ba prezidente foun tenke aselera mós ami nia direitu ba konvensaun, direitu ba ema ho defisiénsia, tanba ami mós hein hela ida ne’e, no wainhira iha projetu ruma karik Prezidente tenke ko'alia ho Governu sira wainhira halo edifísiu ruma karik tenke inkluzivu atu nune’e ema ho defisiénsia sira bele asesu ho livre, tanba ami ho defisiénsia iha Timór laran ne’e hamutuk rihun tolunulu (30.000) liu sei ba fó ami-nia votu tuir konsiénsia ami ida-idak nian,“ nia akresenta.