EKIPA KONJUNTA KAPTURA JOVEN NA'IN-9 NE'EBÉ NA'OK MOTÓR NO TELEMÓVEL IHA DILI NO KOVALIMA
Dili, 29 setembru 2023 - Ekipa konjunta hosi Servisu Investigasaun Kriminál Nasionál (SIKN), Servisu Informasaun Polisia Nasionál (SIPN) liuhosi Araña Oeste, Forsa Polisia (FP), hamutuk ho SNI (Servisu Nasionál Intelijénsia) kaptura joven hamutuk na'in sia ho naran inisiál RDP alias (RB), AJDS alias AD, RML, AMA, RDS, JSS, ACF, LCA no LDP, ne'ebe komete krime furtu argavadu hodi na'ok motor iha kapital Dili. Suspeitu hirak ne'e ekipa konjunta kaptura uluk na'in haat iha área Tasi-tolu, na'in haat seluk iha área Kaikoli no ikus liu kaptura na'in ida iha área Bebora. Ekipa rekolla mós evidénsia motór ho marka beat kor metan hamutuk rua no laiha xapa matríkula, inklui telemovél tolu ho marka iPhone, Samsung no Oppo hosi suspeitu sira.
Iha prosesu identifikasaun suspeitu sira deklara motorizada hirak ne'e na'ok iha fatin sira iha Dili laran hanesan Taibesi, Tasi-tolu no balu hosi munísipiu Kovalima. Sira mós deklara katak evidénsia balu sira fa'an ona ba ema ne'ebe sira rasik la koñese ho presu ne'ebe baratu tebes. Oras ne'e daudaun evidénsia sira ne'e iha ona PNTL nia liman, nune'e ba komunidade sira ne'ebe durante ne'e motór no telefone lakon bele ba direta iha edifísiu SIKN iha Kuartél Jerál PNTL Kaikoli, Dili lori ho dokumentu komprovativu hodi halo konfirmasaun.
Fonte: Mídia Serviço Relações Públicas de Ministério do Interior
