Dili, 28 Outubru 2021 – Ekipa konjuntu ba boa governasaun ne’ebé kompostu hosi Komisaun Anti Korupasaun (KAK), Diresaun Nasionál Transporte Terestre (DNTT), Diresaun Jerál Patrimóniu Estadu, no Polísia Nasionál Timor-Leste (PNTL), sei hala’o fiskalizasaun no kontrolu ba viatura Estadu nian ne’ebé movimenta iha tempu feriadu ba selebrasaun loron Finadu ne’ebé monu iha 02 Novembru.
“Sesaun konvokatóriu ida atu halo press release kona-ba implementasaun programa ida kona-ba ekipa fiskalizasaun konjunta ba iha kontrolu movimentu viatura estadu, ne’ebé tuir padraun PPO estabelese tiha ona, fó mandatu ba ekipa ida ne’e hodi halo koordenasaun ba iha ámbitu loron feriadu, fin semana no fora hosi períodu normál oras servisu ninian. Servisu ne’ebé ekipa fiskalizadór halo mai ho baze dekretu lei nú. 8/2003, define kona-ba utilizasaun viatura Estadu. Viatura Estadu uza ba iha finalidade servisu nian iha oras servisu, karik iha fin semana, loron boot atu halo movimentu presiza iha karta autorizasaun ida atu halo movimentu ho di’ak. Segundu, haree mós ba períodu normál utilizasaun viatura Estadu ninian, hosi oras 7:00 too 19:00. Ba sira ne’ebé la kumpri, signifika nia la tuir kumprimentu no bele hetan sansaun ruma,” Diretór Diresaun Jerál Jestaun Patrimóniu Estadu, Januário da Gama, informa ohin (28/10) liuhosi konferénsia imprensa ne’ebé ekipa konjunta hala’o iha edifísiu Patrimóniu Estadu, Balide, Dili.
Fiskalizasaun konjunta ne’e sei halo hahú hosi 30 Outubru to’o 30 Novembru 2021, iha teritóriu tomak, no sei hetan observasaun hosi Komisaun Funsaun Públika.
Fonte: Comissão da Função Pública (CFP)