Dili, 13 Dezembru 2021 – Ministru Administrasaun Estatál (MAE), Miguel Carvalho, iha segunda (13/12) ne’e informa katak, Governu aumenta tán sentru votasaun ba 1.200 iha teritóriu Timor-Leste hodi prepara ba Eleisaun Prezidensiál ne’ebé sei realiza iha tinan 2022.

“Sei aumenta sentru  votasaun no estasaun votu sira iha teritóriu Timor-Leste tomak. Iha eleisaun 2018 Governu tau de’it sentru votasaun 885, maibé ba eleisaun Prezidensiál 2022 sei aumenta sentru votasaun ba 1.200. Aumenta pur-volta 27% hosi sentru votasaun 2018. Estasaun votu sira STAE propoin ona atu hasa'e hosi 1.260 iha 2018 ba 1.500 iha tinan 2022, aumenta 23% hosi estasaun votu 2018 nian,” MAE informa hafoin hasoru malu ho Prezidente Repúblika (PR) Francisco Guterres Lú Olo, iha Palásiu Prezidensiál Nicolau Lobato, Dili.

MAE akresenta tán katak partisipasaun votante sira nian iha eleisaun 2018 hamutuk 81% de’it, signifika 19% mak la ba vota. Tanba ne’e esforsu Governu nian hamutuk ho Sekretaria Tékniku Administrasaun Eleitorál (STAE) no Komisaun Nasionál Eleisaun (sigla portugés CNE)  hakarak aumenta taxa votante sira nian liuhosi aumenta sentru votasaun no estasaun votu.