Manufahi, 19 Marsu 2022: Inan-faluk Mafalda dos Santos tinan 80, ho nia alin Fernanda da Silva (faluk) tinan 72, hela iha uma kondisaun atu monu, sábadu (19/03) ohin, la'o ain ho distánsia kilómetru 6 (6km), hosi Aitau área suku Daisua postu-administrativu Same, ba tuir votasaun iha estasaun votu Lianai aldeia Raimera suku Babulo postu-administrativu Same.

Faluk Mafalda dos Santos haktuir, “ami na'in-3 bin-alin mesak faluk, ami hosi suku Babulo maibé ami hela mesak iha Aitau área suku Daisua nian, ami la'o ain hosi Aitau tuku 5 dadeer-saan mai tuir votasaun iha ami-nia aldeia Raimera iha estasaun votu Lianai”.

Terseira idade ne'e hateten, iha uma sira na'in-3 maibé sira na'in-2 de'it mak ba tuir votasaun, tanba alin ida seluk la'o labele ona.

“Maske distánsia dook maibé ami hakarak tuir votasaun hodi hili ita-nia na'i-ulun Estadu nian, molok ami remata ami-nia jornada moris iha mundu ne'e," Mafalda informa.

Nune'e mós Eliza Fernandes tinan 40 resin seidauk hola mane, nu'udar subriña hosi faluk na'in-3 ne'e haktuir katak, “ha'u oan hosi faluk na'in-3 ne'e nia alin, maibé ha'u-nia inan mate iha ai-laran tanba militár Indonézia mak tiru, maibé agora ha'u seidauk hetan subsídiu ba veteranu nian tanba foin prosesu, ha'u hela ho ha'u-nia inan faluk na'in-3 ne'e tanba sira mak hakiak hafoin ha'u-nia inan mate iha ai-laran. Ha'u ho faluk na'in-3 ne'e halo rasik to'os kuda batar, ai-farina hodi sustenta ami-nia moris, maske inan faluk na'in-3 ne'e hetan hela subsidi terseira idade nian, maibé osan ne'e la to'o hodi hadia ami-nia uma ne'ebé ameasadu monu.

Vizínu Angelino Lobato, fó sasin katak, “ha'u sente triste tanba faluk na'in-3 ho nia subriña hela mesak iha uma ho kondisaun hali’is ona atu monu, tanba ne'e presiza hetan atensaun hosi Estadu hodi hadi’a sira-nia uma.

Tuir observadór iha estasaun votu Lianai, aldeia Rameira terseira idade balu ho kondisaun matan aat, inklui terseira idade sira seluk antusiazmu ba tuir votasaun.