Timor News, 13 Abril 2022 – Pájina ofisiál Facebook Bíblia no Orasaun husik hela reflesaun importante ida kona-ba importánsia hodi hadomi no respeita inan-aman inklui família sira hotu atu ita bele haksolok, hakmatek no iha vida naruk durante moris iha mundu ne’e, refere ba bíblia antigu testamentu, Efesu kapítulu 6 versíkulu 2 to’o 3.
Liuhosi reflesaun ne’e, fó hanoin ba ita atu bele kumpriende katak hadomi no respeitu ne’e parte ida moris nian, no husu atu ita labele haluha katak fofoun ita moris, inan-aman no família sira mak hadomi uluk ita. Ida ne’e prátika umana no realidade maibé jeralmente ema barak bainhira tama iha adolénsia no sai bo’ot, sira hadomi liu fali sira-nia doben, ema ne’ebé sira foin koñese hodi hamihis tiha fali respeitu no domin ba inan-aman no família sira.
Domin no respeita bele ekspresa liuhosi meiu oioin. Maneira simples ho valór aas, purezemplu, kuidadu sira no iha ba sira bainhira sira presija. Se ita nia inan-aman ka família ne’ebé fó ona tempu barak hodi kuidadu ita presija ita-nia tulun ita ignora tiha, oinsá mak ita bele fó fali importánsia ba ema ida ne’ebé ita foin koñese maibé presija ita-nia tulun? Se ita haluha hodi selebra aniversáriu ita-nia inan-aman sira nian, oinsá mak ita bele gasta fali osan, hanesan hola prezenti, no tempu hodi selebra fali aniversáriu ema ne’ebé foin ita koñese nian?
Ba ita hotu, bele ka lae ita kuidadu fali ita-nia inan-aman ne’ebé kuidadu ona ita ba tempu naruk no respeita sira, inklui ita-nia família sira bainhira ita bo’ot ona? Tempu ba ita ida-idak atu reflete.
Fonte: Pájina Facebook Bíblia no Orasaun