Dili, 09 Setembru 2021: Porta-vóz Konsellu Ministru Fidelis Magalhães informa katak Konsellu Ministru hala’o reuniaun ohin (09/9) no kontinua impoin medida distánsia sosiál nian durante implementa Estadu Emerjénsia (EE) katak ema na’in rua ne’ebé hela iha uma keta-ketak ba hasoru malu labele rabat malu menus hosi metru ida (1).
Fidelis esplika, ne’e nu’udar medida ida hosi Dekretu-Lei númeru 21/2021 kona-ba medida implementasaun EE ne’ebé Konsellu Ministru halo alterasaun dahuluk iha reuniaun refere. Ho alterasaun ne’e, Governu mós permite ona atu hala’o atividade relijiozu, sosiál, kulturál no desportu sira, maibé tenke kumpri nafatin regra prevensaun Covid-19 liuliu distánsia sosiál.
“Maibé tenke kumpri medida sira prevensaun no kontrolu Covid-19 liuliu tenke mantéin distánsia pelu-menus metru ida ho ema seluk liuliu ba sira ne’ebé la hela hamutuk iha uma ida. Ezemplu ema ida la hela hamutuk ho ema seluk iha uma ida no nia atu ba hasoru ema seluk ne’ebé hela iha uma seluk ida, hasoru malu iha li’ur sira na’in rua tenke halo distansiamentu. Na’in rua ne’e labele hasoru malu rabat malu menus hosi metru ne’ebé husu, no ezije atu uza máskara,” Fidelis informa ohin iha Palásiu Governu, Dili, hafoin remata reuniaun.
Nia akresenta katak ema sira ne’ebé hamutuk iha fatin ida no la kumpri distánsia sosiál ka rabat malu menus hosi metru rua (2) ne’e konsidera nu’udar ‘halibur malu’, no ida ne’e Governu la permite.
Porta-vóz Konsellu Ministru ne’e dehan katak Polísia iha devér atu halo intervensaun ba ema hirak ne’ebé la kumpri regra sira ne’e durante EE.
Fonte: Mídia Gabinete do Primeiro-Ministro (GPM)