Dili, 25 Outubru 2021 – Suku Vatuvou ne’ebé pertense ba postu-administrativu Maubara, munisípiu Likisá, mak sai nu’udar manán-na’in dahuluk ba prémiu ‘Habali Ambiente’ ne’ebé kompete hosi suku hamutuk 452 iha Timor-Leste.
Hafoin Vatuvou, tuir kedas mak suku Seloi Malere (Aileu) nu’udar manán-na’in daruak no suku Kairui (Manatutu) nu’udar manán-na’in datoluk.
Suku hirak ne’ebé sai nu’udar manán-na’in ne’e simu direita prémiu hosi Primeiru-Ministru Taur Matan Ruak no membru Governu sira iha serimónia komemorasaun Loron Nasionál Ambiente ba dala VI ne’ebé hala’o iha segunda (25/10) ne’e iha Ministériu Finansa, Dili.
“Iha biban ida ne’e, ha’u hakarak hato’o ho laran ha’u nia parabéns ba suku premiadu sira hotu. Hato’o mós ha’u-nia parabéns ba na’i Administradór Munisípiu sira ne’ebé suku premiadu sira pertense ba. Liafuan ida espesiál ha’u hato’o ba na’i Xefe suku sira hosi Vatuvou, Laho mean, Uma-Tolu, Kairui no Seloi Malere, hodi dehan ba sira katak hahú hosi ohin ba oin ita-boot sira sei sai modelu ezemplár ida ba suku sira seluk paíz nian. Ita boot sira-nia suku sei nakfilak-an ba zero toleránsia ba krimi ambientál, iha ne’ebé laiha tán ema sunu rai, sunu ai-horis no ai-hún, nune’e mós soe lixu ba mota ka iha tasi-ibun sira. Laiha tán ema iha imi-nia suku ne’ebé foti hahalok iresponsável hodi lori impaktu negativu ba bee-matan sira iha aldeia,” Primeiru-Ministru dehan iha nia diskursu hafoin fahe tiha prémiu.
Fonte: Mídia Gabinete do Primeiro-Ministro (GPM)