Dili, 11 Novembru 2021 – Diretór Eskola Sekundária Nicolau Lobato Tasi-Tolu, Marcos Soares Pacheco, informa katak livru ba matéria sira iha eskola refere oras ne’e menus tebes tanba Ministériu Edukasaun fahe to’o de’it iha tinan 2012, no tinan barak ona la distribui.
“Preokupasaun ne’ebé ami hasoru durante ne’e mak livru. Livru ne’ebé ami fahe ba estudante ne’e dezde ami simu iha 2012 to’o agora. […] Agora livru ba matéria balu mai ami laiha teb-tebes ona. Ne’e la’os eskola ida ne’e de’it maibé eskola balu mós iha difikuldade ne’ebé hanesan, livru menus, tanba fahe komesa hosi 2012 to’o agora tinan hira kedas ona ami la hetan ona livru ne’ebé hosi Ministériu Edukasaun,” Diretór ne’e relata ba jornalista Timor News, ohin (11/11) iha nia knaar-fatin, Tasi-Tolu, Dili.
Aléin hosi ne’e, Diretór Marcos mós hateten katak sira iha estudante barak tebes nune’e sala aula la sufisiente, maibé parte Fundasaun planeia ona atu konstrui tán sala aula iha tinan oin.
Diretór ne’e husu ba estudante sira atu estuda no prepara-an ho didi’ak tanba ezame pasajen klase no ezame nasionál besik ona.
Fonte: Timor News