Dili, 08 Dezembru 2021 – Komandante Eskuadra Polísia Dom Aleixo, Américo Fátima da Costa, informa katak Eskuadra Polísia Dom Aleixo tinan-tinan hasoru beibeik problema inundasaun no bee tama to’o iha edifísiu laran wainhira akontese udan boot.

“Inundasaun ne’e kuaze tinan-tinan tanba ami-nia edifísiu ne’e hahú harii iha 2001 to’o agora ninia situasaun mak ida ne’e, bee sai fatin (bee nia dalan) laiha tanba populasaun nia uma halo sa’e hotu, sorin halo sa’e, ema halo otél boot ida iha kotuk tán entaun bee sai fatin la di’ak ,” Komandante Eskuadra Polísia Dom Aleixo informa ba jornalista Timor News, ohin (08/12) iha ninia knaar-fatin, Dili.

Komandante ne’e dehan katak parte relevante sira uluk halo ona dezeñu foun ba edifísiu Eskuadra Polísia Dom Aleixo no aprova ona maibé to’o agora rezultadu laiha.

“Ha’u hanesan Komandante foun iha ne’e, sira dehan uluk ne’e planu iha tiha ona, aprovasaun halo tiha ona, ninia dezeñu iha tiha ona, maibé rezultadu to’o agora laiha, seidauk halo to’o agora. Ami husu para boot sira tenke tau-matan ba ami para ami hatudu prestasaun di’ak maibé kondisaun mós tenke favorável,” nia dehan.

Iha observasaun direita ohin parte loro-kraik hafoin udan para uitoan, Timor News nota katak bee nalihun hela iha edifísiu Eskuadra Polísia refere, Komandante akresenta, sira tenta hasai hela bee ho jeradór.

“Agora daudauk imi haree ami uza jeradór hodi tiru sa’e fali bee ne’e ba leten hafoin bele hasai bee ne’e. […] Uluk bee tama to’o iha ita-nia kanotak ne’e. Ohin ne’e minutu hira de’it mak nalihun hanesan ne’e ona, maibé kuandu oras ida ka rua liu ne’e ami dolar. Kondisaun edifísiu ne’e, ami presiza atu ateru aas ho estrada ne’e hanesan,” nia dehan tán.