Dili, 28 setembru 2023 - Prezidente empreza internasionál East Timor Trading (EST), Sakib Awan, hasoru malu ho Primeiru Ministru, Kay Rala Xanana Gusmão, iha Kinta (28/09) ne'e hodi relata sira nia atividade atu loke tan investimentu hodi kontribui ba dezenvolvimentu ekonómia Timor-Leste nian. Investimentu ne'ebé empreza ne'e planeia atu loke tan ho naran “Discovery Business Industrial Zone Center" ho nia durasaun entre tinan lima to’o hitu, ne’ebé sei halo iha Fomentu II, Dili. Daudaun ne'e sira prepra tiha ona rai kuaze ektare hitu sei dezenvolve área ne’e iha faze tolu, dahuluk sei investe millaun $12, daruak millaun $32, no ikus liu millaun $55. 

Sakib Awan mós hato'o ba PM Xanana katak, molok atu loke investimentu refere, sira-nia parte sei fó uluk formasaun ba traballadór Timoroan rihun ida, hodi prepara sira-nia an atu servisu iha área agrikultura, fábrika, prosesamentu, no área seluk tan.

East Timor Trading eziste iha Timor-Leste tinan 12 ona, empreza ne’e loke tiha ona fatin sira hanesan Burger King, Gloria Jeans no loja ne’ebé faan tua, no dadaun ne'e fó ona servisu ba Timoroan hamutuk 200, no sira iha kompromisu hodi redús sasán importasaun liuhosi planu investimentu ne'ebé sira iha. Durante ne'e empreza refere kontribui tiha ona millaun $55 ba reseita estadu nian.