Dili,  30 Maiu 2022 – Estela da Rosa, nu’udar vendedór aifunan ida iha Dare, senti orgullu ho ezisténsia fatin turístiku Laletek Nanis Domin tanba bele hasa’e di’ak liu tán sira-nia rendimentu kada loron kompara ho tempu sira liu bá bainhira fatin refere seidauk dezenvolve. Estela hato’o lia hirak ne’e ba jornalista Timor News iha ninia hela fatin Dare, Dili. 

“Uluk fatin ida ne’ebá (Laletek Nanis Domin) seidauk mosu, entaun ami-nia sasan ema ladun hola. Ami só lori ba [...] estrada públiku maka ema foin bele hola. Maibé kuandu fatin ida Laletek Nanis Domin ne’e mosu ona, ema mós komesa mai hasai foto, mai pasiar, entaun  ami-nia aifunan oan sira ne’e mós komesa folin no kada loron sira bele hola vazu rua ou bele to’o haat. Ami-nia rendimentu kada loron 10 ou 20 dólar ba leten kuandu ema mai vizita fatin ne’e barak [...]”, dehan Estela ba Timor News.

Estela hatutan tan katak benefísiu ne’ebé sira hetan hosi Laletek Nanis Domin responde duni ba ninia nesesidade uma laran no mós bele uza hodi selu oan sira-nia eskola.

Iha fatin hanesan negosiante fa’an kioske, Serafina Liu Abi, mós hatutan tan katak sira sente kontente ho prezensa fatin refere tanba bele aumenta sira nia rendimentu kada loron no fó solusaun ba sira-nia nesesidade uma laran.