Dili, 25 Novembru 2021 – Diretór eskola ensinu sekundária Herois da Pátria, Bekora, Dili, José Dias Guterres informa, estudante terseiru anu hamutuk na'in-95 preparadu ona atu tuir ezame nasionál tinan ida ne’e.
“Eskola ne’e preparadu, matrix mai hotu tiha ona, atu halo revizaun pelu menus semana ida tan,” hateten Diretór José ba jornalista Timor News, ohin (25/11), iha Bekora, Dili.
José relata, relasiona ho data fixu hosi Ministériu Edukasaun, Juventude no Desportu (MEJD) nian kona-ba ezame nasionál ne’ebé sei realiza iha loron 13 Dezembru ne’e, hosi parte eskola ensinu sekundária Herois da Patria, profesór sira sei fó treinamentu antes ba estudante sira kona-ba lala'ok ezame nasionál nian atu nune’e estudante sira bele tuir ezame ho susesu.
Diretór ne'e mós hato'o mensajen katak, estudante finalista sira tenke estuda no iha data ezame nian sira (estudante) tenke marka prezensa atu nune’e pasa iha ezame bele hetan diploma.
“Estudante sira ne’e ami fó hatene tiha ona para mai tuir ezame para bele hetan diploma, se ó (estudante) lakohi mai tuir ezame diploma laiha, no tenke tuir mós matrix ne’ebé profesór sira fó ho tan rezumu ne’ebé edukasaun haruka mai,” José esklarese.
Totál estudante ensinu sekundária Herois da Pátria hamutuk na'in 200, profesór permanente 1, kontratadu 9 no voluntária na'in-9.
Fonte: Timor News