Indonézia, 15 Setembru 2021 – Akontese iha nasaun viziñu Indonézia, estudante sekundária no pré-sekundária barak tebes ho idade minoridade iha parte área rurál sira deside kaben sedu ka forma ona família tanba Governu la reativa eskola hodi realiza aula prezensiál, no aplika nafatin eskola online ne’ebé halo sira sente laiha vontade ka baruk.
iNewsSumtu.id haktuir iha tersa (14/9) ne’e katak, iha ensinu sekundária (indonézia, SMAN) 1 Panyabungan, iha Mandailing Natal (Madina), Sumatera Norte, derepente de’it estudante liu na’in-10 la tama eskola hafoin reativa hikas aula prezensiál. Profesór sira buka-tuir fali no deskobre katak estudante hirak ne’e hili forma ona família tanba sente baruk ho eskola online ne’ebé halo sira iha uma de’it no hasoru mós susar kona-ba internet.
“Ami hakfodak kadeira mamuk hotu. Ami labele halo buat ida sé ida ne’e mak akontese, sé sira hetan ona parseiru hodi forma ona família,” dehan Diretór SMAN 1 Panyabungan.
Aléin hosi ne’e, iha 12 Setembru liubá, telisik.id informa katak, estudante pré-sekundária ida iha sidade Kendari hili kaben sedu tanba kleur ona laiha aula aprendizajen prezensiál ho razaun Covid-19 impede.
Kazu ne’ebé hanesan akontese mós iha fulan Abríl 2021 liubá ne’ebé cnn haktuir katak, iha estudante pré-sekundária na’in-11 iha provínsia Gorontalo, Indonézia, mak deside hodi forma família tanba suspende beibeik atividade prezensiál iha eskola.
“Sira kaben ho idade sei nurak loos, tuir loloos ida ne’e labele. Iha estudante pré-sekundária na’in-11 iha Bone Bolango mak kaben tiha ona,” dehan Autoridade lokal Bone Bolango, provínsia Gorontalo, ho naran Haming Pou.
Fonte: CNN Indonesia