Bobonaru, 04 Agostu 2021 – Estudante hamutuk na’in-178 hosi primeiro to’o nono ano iha Ensinu Báziku Sentrál (sigla portugés EBC) Nunutana, suku Raifun, postu-administrativu Maliana, munisípiu Bobonaru, aguenta ho sala aula tolu de’it durante hala’o sira-nia prosesu aprendizajen, haktuir informasaun ne’ebé Adjuntu EBC Nunutana Baltazar Soares Barros hato’o ba jornalista Timor News ohin (04/8) via telefone.

Tanba ne’e, Baltazar dehan katak obrigatoriamente tenke fahe oráriu ba parte dadeer no loro-kraik ba estudante sira. Nia akresenta, eskritóriu profesór sira nian mós kloot tebes nune’e la sufisiente atu profesór sira hotu-hotu tama no túr iha laran.

“Ami-nia difikuldade ba ami-nia eskola ne’e, ida kona-ba edifísiu tanba ami-nia alunu kompostu hosi primeiro ano to’o nono ano aguenta ho sala tolu de’it. Ida fali kona-ba ami-nia eskritóriu, ami-nia eskritóriu ne’e, kantor eskola nian aguenta ho sala kloot oan ida, sasán butuk, mestre sira tama hotu ba laran mós la di’ak, túr fatin la to’o,” dehan Baltazar.

Enkuantu EBC Nunutana iha Profesór permanente hamutuk na’in-12, kontratadu na’in-7 no reklamadu na’in-4.

Aléin hosi ne’e, Baltazar relata tán katak eskola refere mós hasoru problema bee-moos ne’ebé importante tebes ba estudante sira-nia saúde.