Dili, 03 Maiu 2021 – Estudante hamutuk na’in-15 Drop Out (DO) hosi Institutu Politékniku Betanu (IPB), Same, Manufahi, tanba ne’e sira husu ba Parlamentu Nasionál (PN) no Governu liuhosi Ministériu Ensinu Superiór, Siénsia no Kultura (MESSK) atu halo fiskalizasaun ba IPB liuliu ba Dosente balu nia métodu tanba deskonfia hamosu diskriminasaun no iregularidade.
Liuhosi konferénsia imprensa ne’ebé hala’o ohin (03/5) iha kampus IPB, Porta-vóz Estudante DO Deonato da Silva hateten, PN no MESSK presiza halo fiskalizasaun urjente ba IPB tanba aktu hosi dosente balu impede sira-nia futuru.
Nia esplika, “dosente ho naran Claudio Ximenes lori matéria Estatístika iha Semestre III fó valór kualitativa D ba estudante sira, nune’e sira hakarak tuir hikas ezame rekursu atu rekupera ba valór C, maibé dosente ne’e la fó oportunidade atu tuir ezame rekursu, balu tuir duni ezame rekursu maibé valór nafatin D sein justifikasaun”.
Estudante hirak ne’e lamenta mós tanba sira hetan valór E hosi dosente Claudio no sira iha dalan atu tuir fali ezame rekursu maibé dosente la fó oportunidade hodi halo fali presaun hasoru sira.
Estudante Deonato mós hato’o lamentasaun kona-ba dosente balu tán ho naran Pedro de Deus no Abilio dos Santos tanba la fó valór ba matéria prátika balu ne’ebé estudante sira implementa.
Hatán ba ida ne’e, dosente Pedro de Deus esplika katak, estudante sira-nia deklarasaun ne’e la loos tanba tuir regulamentu IPB nian, "estudante ne’ebé foin tama eskola durante tinan ida nia laran IPB aplika ano preparatório ka ano zero, tanba ne’e kuandu iha semestre I mak estudante sira la pasa matéria ida, labele kontinua ba semestre II, nune’e mós iha tinan akadémiku kuandu estudante sira hetan valór E automatikamente estudante sira drop out ona".
Fonte: Diáriu "Roman ba Sosiedade" Manufahi