Dili, 05 Agostu 2021 – Estudante hosi Universidade Nasionál Timor Lorosa’e (UNTL) balu ne’ebé ativu hela sente triste tanba sira seidauk simu subsídiu pulsa ne’ebé Governu fó hodi uza ba aula online enkuantu sira-nia maluk estudante ativu balu simu tiha ona.
“Seidauk (simu). Kolega sira seluk ami departamentu ida de’it ne’e barak hetan ona maibé ami kuaze barak seidauk. Ha’u sente triste tanba ami eskola online ne’e hakarak ka lakohi tenke hola pulsa hela de’it sedangkan agora hanesan ne’e inan-aman balu mós la servisu, depois atu hetan pulsa mós araska la halimar,” Jaquelina do Rego Ferreira hanesan estudante ida hosi UNTL hato’o informasaun ne’e ba jornalista Timor News iha kinta (05/8) ne’e iha kampus sentrál UNTL, Dili.
Iha fatin hanesan, preokupasaun refere hato’o mós hosi estudante UNTL Abelita Pinto ho sentimentu triste tanba to’o agora nia kontinua sosa rasik pulsa hodi tuir aula online enkuantu subsídiu pulsa hosi Governu ne’e fahe ona maibé nia seidauk hetan.
“Tanba saida mak nu’udar estudante hotu, balu hetan nusá mak balu la hetan. […] Estudante foun sira barak mós seidauk hetan. Nusá mak ami-nia kakak sira hetan no ami la hetan?,” Abelita kestiona.
Tanba ne’e estudante sira husu atu Governu fahe subsídiu ne’e ho garantia katak estudante hotu-hotu tenke hetan. Sira mós husu ba Governu katak di’ak liu reativa ona aula prezensiál nune’e labele gasta beibeik osan ba pulsa hodi tuir aula online ho internet ne’ebé la kualidade.
Fonte: Timor News