Dili, 07 Jullu 2021 – Estudante hosi Universidade Nasionál Timor Lorosa’e (UNTL) husu atu Governu kumpri sedu nia promesa atu fahe subsídiu pulsa $10 hodi fasilita estudante sira atu partisipa iha aula online durante implementasaun Serka Sanitária relasiona ho pandemia Covid-19.
“Pesoál mai ha’u, ha’u kontente wainhira ha’u nia osan iha atu sosa pulsa hodi tuir aula online, maibé kuitadu osan laiha pasénsia la tuir ona eskola online. […] Ha’u hakarak sujere ba Governu kona-ba pulsa ka internet gratuita ne’ebé sira mensiona tiha ona ba públiku no liuliu kona-ba ami estudante rona hotu ona, maibé na realidade hatudu katak to’o agora seidauk ida. […] Husu dala ida tán ba Governu di’ak liu aplika sedu tiha buat ne’ebé mak ita-boot sira promote ka ko’alia ona,” dehan Agostinho Ximenes da Cruz nu’udar estudante hosi Komunikasaun Sosiál, UNTL, ba Timor News ohin (07/7) via telefone.
Agostinho akresenta katak nia lakon ona matéria barak durante aplikasaun aula online tanba problema pulsa no rede internet la’o la di’ak.
Enkuantu Governu nia polítika atu fahe subsídiu pulsa ba estudante ne’e ho totál $10 ba kada estudante universitáriu, no sei selu mós propinas estudante nian ho limite máximu $150.
Fonte: Timor News