Dili, 13 Setembru 2021 – Estadus Unidus Amérika oferese tán apoiu fundu millaun $1 liuhosi USAID ba Timor-Leste hodi kombate pandemia Covid-19.
Nune’e to’o oras ne’e EUA oferese ona orsamentu ho totál millaun $5 ne’ebé sura hamutuk ho apoiu adisionál $1 refere ba Timor-Leste atu luta hasoru Covid-19.
Apoiu adisionál ne’e anunsia hosi Enkaregadu Negósiu Embaixada EUA iha Timor-Leste Tom Daley hamutuk ho Ministra Saúde Odete Freitas Belo, ohin (13/9), iha Kaikoli, Dili.
“Estadus Unidus hamriik hamutuk ho Timor-Leste nu’udar amigu no parseiru rohan laek atu servisu hamutuk hakotu Covid-19. Ami hakat hamutuk ho Timor-Leste atu salva ema nia vida tanba ita hotu tenke halo ida ne’e duni,” dehan Tom Daley iha serimónia refere.
Tom Daley mós enkoraje timoroan sira atu tenke simu vasina kontra Covid-19 tanba ida ne’e mak dalan di’ak liu atu hapara Covid-19.
Enkuantu apoiu fundu adisionál ne’e sei ajuda asegura timoroan sira iha komunidade rurál atu ba vasina no hetan tratamentu saúde ho kualidade hosi profisionál saúde sira.
Fonte: Mídia Embaixada Amerika iha Timor-Leste