Dili, 31 Maiu 2022 - Xefe suku Kumoro, Eurico Guterres, hateten katak komunidade ne’ebé hela iha mota ninin maioria mak povu ne'ebé mai hosi foho hodi buka moris iha Dili. Maske parte Protesaun Sivíl halo ona sosializasaun atu labele hela iha fatin sira ne'ebé risku ba dezastre, maibé komunidade sira seidauk iha konsiénsia no sei kontinua hela iha fatin hirak ne’e. 

“Komunidade tenke iha ona konsensu atu labele hela iha área ne’ebé mak sai risku ba sira-nia vida. Bainhira hetan dezastre, komunidade tenke muda sai ona hosi mota ninin, hosi luron ninin no mós hosi tasi ibun sira ne’ebé mak sempre bee sa’e, hodi nune’e komunidade bele moris iha fatin ne’ebé mak seguru no la fó perigu ba sira nia vida,” dehan xefe suku Kumoro ba jornalista Timor News nian iha sede suku Kumoro (25/05). 

Eurico hatutan tán katak parte protesaun sivíl agora daudaun sei prepara hela lei ba protesaun sivíl, bainhira remata ona, hetan ona aprovasaun hosi Governu no Parlamentu Nasionál, no Prezidente Repúblika promulga ona mak komunidade nafatin hela iha fatin sira ne'ebé risku ba dezastre hanesan mota ninin, sira mak sei responsabiliza ba sira-nia an.

Nune’e, Eurico husu ba komunidade sira atu evita hela no halo uma iha área sira ne’ebé risku ba dezastre hodi labele fó perigu ba sira-nia moris.