Dili, 09 Novembru 2021 – Ministru Edukasaun, Juventude no Desportu (MEJD) realiza serimónia lansamentu impresaun pontu ba ezame nasionál no lokál ba tinan letivu 2021, ohin (09/11) iha salaun imprime, Diresaun Nasionál Impresaun (DNI), Komoro, Dili, hodi prepara ba ezame nasionál ne'ebé sei hala’o iha 13 to’o 15 Dezembru no ezame lokál ne’ebé sei hala’o iha 16 to’o 18 Dezembru, iha tinan ida ne’e.
Enkuantu preparasaun imprime pontu ezame nasionál no lokál ne’e sei remata iha loron 10 Dezembru.
“Husu ba ekipa ne’ebé envolve-an direita iha atividade ida ne’e, tenke iha responsabilidade formál no morál, konsiénsia no sentidu misaun nian, hodi bele realiza ezame nasionál ho susesu,” dehan Ministru Edukasaun, Juventude no Desportu, Armindo Maia, iha lansamentu refere.
Iha serimónia ne’e, Koordenadór Gabinete Avaliasaun no Dezenvolvimentu Kurikulár (GADK), Pedro Ribeiro Gonçalves, relata mós katak, totál finalista bazeia ba manuál ezame nasionál tinan letivu 2021, hamutuk finalista 58.224, kompostu hosi Ensinu Báziku ho totál finalista hamutuk 31.143, Ensinu Sekundáriu Jerál ho totál finalista 22.223, no Ensinu Sekundáriu Tékniku-Vokasional ho 4.858.
“Espera ita hotu bele kontribui ba susesu ezame nasionál nian, la’os de’it ba ekipa ne’ebé servisu iha impresaun maibé tantu dirijente no mós funsionáriu sira,” Koordenadór GADK dehan.
Fonte: Ministério da Educação, Juventude e do Desporto (MEJD)