Dili, 14 Jullu 2021 – FALINTIL-Forsa Defeza Timor-Leste (F-FDTL) sei monta tán postu seguransa iha fronteira terestre entre Timor-Leste ho Indonézia hodi prevene ema tama-sai ilegál hada’et Covid-19 variante Delta hosi Indonézia mai Timor-Leste.
“Ohin ami mai hato’o no atualiza ba Prezidente Repúblika (Francisco Guterres Lú Olo), kona-ba prosesu rekrutamentu ninian, no mós atu monta tán postu seguransa iha liña fronteira hodi reforsa tán ita-nia Polísia, ida ne’e mak ohin ami mai informa ba Prezidente Repúblika,” dehan Vise Xefe Estadu Maiór Jenerál F-FDTL Majór Jenerál Falur Rate Laek, ohin (14/7) iha Palásiu Prezidensiál, Dili, hafoin hasoru malu ho Prezidente Repúblika.
Nia akresenta katak iha tempu besik sei monta tán postu seguransa iha liña fronteira tanba oras ne’e virus variante Delta sa’e maka’as iha nasaun viziñu Indonézia.
“Agora daudauk virus variante foun komesa sa’e maka’as ona iha ita-nia nasaun Viziñu Indonézia,” dehan Falur.
Prezidente Repúblika mós husu ba F-FDTL no Polísia Nasionál Timor-Leste (PNTL) atu kontinua koopera hodi evita migrasaun ilegál ne’ebé fó risku atu hada’et variante foun mai Timor-Leste.
Fonte: Relação Pública F-FDTL