Manufahi, 15 Setembru 2021 – Responsável ekipa Centro Foinsa’e Dom Boaventura Manufahi (CEFOBOM) Justa da Silva informa ohin (15/9) katak, família vulnerável sira iha suku Holarua, postu-administrativu Same, munisípiu Manufahi, hasoru susar menus ai-hán iha uma-laran tanba pandemia Covid-19.
Justa da Silva hato’o ida ne’e hafoin CEFOBOM ba halo identifikasaun iha suku refere ohin, no entrevista mós família vulnerável sira.
Responsável ekipa CEFOBOM ne’e relata katak, ekipa halo entrevista ho Marçal da silva nu’udar reprezentante família vulnerável iha aldeia Haturae, no Marçal informa katak durante pandémia Covid-19 problema ne'ebé família vulnerável sira hasoru mak menus ai-hán iha uma laran, inklui nesesidade bázika sira seluk. Marçal dehan, Estadu Emerjénsia ne'ebé Governu aplika difikulta komunidade família vulnerável sira atu hetan ai-hán tanba produtu lokál la folin iha merkadu.
Nune'e mós defisiente Trinitos do Rosário informa katak, problema ne'ebé hasoru iha família mak hanesan bee-moos, no susar atu atende nesesidade loro-loron.
Aléin hosi identifika situasaun ne'ebé komunidade sira hasoru, CEFOBOM fahe mós informasaun kona-ba oinsá atu prevene-an hosi Covid-19.
Fonte: Diáriu "Roman ba Sosiedade" Manufahi