Manufahi, 12 Jullu 2021 – Feto ida ho naran Ana Maria Marques idade tinan 29 hakotu-iis ho tara-an ohin (12/7) iha Manumera, postu-administrativu Turiskai, munisípiu Manufahi, hodi husik hela nia la’en no oan na’in-4.
ARS informa, Xefe suku Manumera Isabel de Jesus konta tuir kronolojia katak, “ohin dadeer-saan molok Ana nia la’en ba hanorin iha eskola, matebian Ana sei ko’alia hela ho nia la’en kona-ba atu sosa sasán hodi hadi’a sira-nia uma. Matebian hela iha uma ho nia oan ki’ik na’in-2, derepente nia oan ba fó hatene ba matebian nia la’en iha eskola no ba família sira katak matebian tara-an iha sira-nia uma laran”.
Xefe suku ne’e akresenta, família matebian deside atu entrega mate-isin ba polísia hodi holo autópsia atu justifika kauza hosi akontesimentu refere. Família haktuir katak durante ne’e matebian laiha problema ruma ho nia la’en, família no viziñu sira.
Tanba ne’e parte polísia hamutuk ho lideransa komunitária, servisu saúde Turiskai no mós família matebian rasik daudauk ne’e sei halo hela prosesu investigasaun hodi entrega mate-isin ba autoridade kompetente atu submete ba prosesu autópsia.
Fonte: Diáriu "Roman ba Sosiedade" Manufahi