Dili, 12 Outubru 2021 – Xefe suku Kampung Alor, Alcina Carvalho dos Santos, husu ba foinsa’e feto no mane sira iha suku Kampung Alor, Dili, katak wainhira tuku 8 kalan ona ida-idak tenke tama ba nia uma hodi prevene konflitu oioin.

Nia husu liuliu ba inan-aman ka família sira atu kontrola ida-idak nia oan nune’e labele sai beibeik ba estrada iha tempu kalan.

“Favór ida husu ba inan-aman sira ne’e kalan tenke kontrola ita-nia oan sira ne’ebé mak joven hela ne’e feto ka mane, kuandu tuku 8 ka 9 kalan ida-idak iha nia uma ona. Labele gosta ba túr iha estrada, sai ba estrada tanba sei kria fali problema,” Alcina informa ba jornalista Timor News, ohin (12/10), iha nia knaar-fatin, Kampung Alor, Dili.

Nia mós dehan katak foinsa’e sira tenke kuidadu saúde no prepara-an tanba sei lidera hikas Timor-Leste iha futuru.

“Imi juventude rai ida ne’e nian, imi mak aban-bainrua lidera rai ida ne’e la’os ami. Tanba ne’e ita-boot sira tenke kuidadu saúde, karik eskola hotu ona entaun inan-aman tenke kontrola para aban-bainrua imi bele manán futuru. Husu ba inan-aman sira favór ida, oras ida tuku 8 (kalan) ne’e oan sira iha uma ona. Labele gosta mai túr iha estrada, labele gosta mai hemu lanu iha estrada, depois seguransa baku imi dehan seguransa mak sala fali […]. Ne’e oras deskansa,” nia dehan.