Dili, 3 Novembru 2022 - Primeiru Ministru, Taur Matan Ruak, iha okaziaun selebrasaun loron nasionál ba feto ne’ebé monu iha loron 3 fulan Novembru, hodi husik hela mensajén ba povu sira iha Timor-Leste katak feto-nia papel importante iha istória luta ba ukun-an no iha prosesu dezenvolvimentu nasionál. 

“Loron ohin, loron espesiál ba inan-feton sira iha Timor-Leste, loron ne’ebé Governu deside nu’udar Loron Nasionál ba Feto iha Timor-Leste, koinsidénsia ho loron mate eroína bo’ot, Maria Tapó, nu’udar onra ba feto timoroan hotu-hotu ne’ebé ho dedikasaun tomak no brani hodi hamriik hamutuk ho asuwa’in mane sira iha luta kontra okupasaun estranjeira durante tinan 24 nia laran, ne’ebé ikus mai ita sai duni nasaun ida livre no independente. Loron 3 Novembru nu’udar loron reflesaun atu ita reflete kona-ba importánsia papel ita-nia inan-feton sira nian iha prosesu dezenvolvimentu nasionál, ne’ebé inan-feton sira dezempeña hahú kedas iha tempu luta.”

Primeiru Ministru mos realsa katak feto nu’udar  ajente transformasaun no mudansa iha família, eskola, servisu fatin, no komunidade.

“Iha dezafiu barak, ita konta ho inan-feton sira hanesan ajente transformasaun no mudansa, iha família, eskola, iha servisu-fatin, empreza, no komunidade sira. Feto hotu-hotu, liuliu feto sira hanesan dirijente ho reprezentatividade iha lideransa, aleinde kontribui ho kapasidade no koñesimentu sientífiku, étiku no morál sira ne’ebé aumenta beibeik ba igualdade jéneru nian, sai mós nu’udar protagonista no na’in ba polítika públika kona-ba lejitimidade demokrátika, governasaun di’ak no dezenvolvimentu ne’ebé sustentável liu. Ba inan-feton nasionál hotu ne’ebé ohin, selebra Loron Nasionál Feto nian, loron festivu ba empoderamentu femininu. Governu daualuk ida ne’e kompremitidu tau ema nu’udar sentru ba dezenvolvimentu, nune’e sei halo esforsu hodi involve inan-feton sira iha prosesu ba dezenvolvimentu ita-nia rain nian.

Nu’udar mensajén ikus, Primeiru Ministru lori Governu Konstitusionál Daualuk nia-naran fó saudasaun espesiál ba inan-feton sira iha Timor-Leste laran tomak, ho votu saúde di’ak no susesu iha família, akadémiku, profisionál no sosiál.