Dili, 26 Janeiru 2022 - Diretór Diresaun Nasionál Empregu Exteriór (DNEE), Filomeno Soares, iha salaun DNEE Bekora, ohin (26/01), hala’o enkontru hó kandidatu traballadór Timor-oan entry-list na’in atus-rua-sanulu (210) ne’ebé tuir planu atu aranka tán ba servisu iha Korea Súl iha loron 18 no 28 Fevereiru 2022.

Iha biban ne’e Diretór DNEE hateten, objektivu hosi enkontru ne’e atu bele informa kritéria ne’ebé Governu Korea Súl fó, no mós orsamentu ne’ebé kandidatu traballadór sira atu perpara, tanba montante orsamentu no kritéria la hanesan ona ho uluk wainhira Covid-19 seidauk mosu.

Kritéria ne’ebé kandidatu sira tenke kompleta mak, vasinasaun kontra Covid-19 kompleta doze daruak, teste médiku no teste PCR Covid-19, molok traballadór aranka ba Korea Súl tenke halo kuarentena durante kalan ida, no ba to’o iha Korea Súl sei halo tán kuarentena durante loron sanulu no teste médiku dala ida tán.

Dirijente ba diresaun ne’e mós apela ba kandidatu traballadór sira ne’ebé naran tama ona iha entry-list, atu hadook-an hosi ransu livre, labele komete krime, no kuidadu nafatin saúde, tanba komete krime no saúde la di’ak sei labele ba servisu iha Korea Súl.

Tempu hanesan Diretór DNEE afirma ba kandidatu traballadór sira katak, seidauk fixu atu sira bele aranka hotu, tanba iha prosesu teste PCR Covid-19 no saúde karik balu hetan moras sei halo kanselamentu, no mós balu empregadór hosi Korea Súl mak seidauk posível atu bele simu.