Manufahi, 14 Marsu 2022 – Filomena da Costa ho idade tinan 30 resin nu’udar feto foinsa’e ida iha bairu Sarmata suku Letefoho postu-administrativu Same, kréditu osan iha Banku Nasionál no Komérsiu Timor-Leste (sigla portugés BNCTL) hodi harii uma ho sala 4 atu bele halibur labarik oan kiak sira iha munisípiu Manufahi.
Filomena da Costa haktuir ba jornalista sira, ohin (14/3), wainhira administradór munisípiu Manufahi Arantes Isaac Sarmento ba vizita fatin refere ne’ebé hanaran Mother Teresa Home Care.
“Uma ho sala 4 ne'e harii iha tinan 2020 liubá hosi osan ne'ebé ha'u kréditu iha BNCTL. Ha'u kréditu osan ne'e hodi sósa materiál hanesan kaleen, bebak, simenti no materiál sira seluk, no hetan ajuda hosi joven sira hosi bairu Sarmata nian no mós familia sira, hodi apoia lalin fatuk, ajuda ne'e no harii uma meiu-parede ho sala 4 ne'e, halibur labarik ki'ik oan sira hosi fatin dook, liuliu labarik sira ne'ebé família laiha kbiit no inan-aman laiha, nune'e sira bele asesu ba edukasaun. Inisiativa harii fatin ne'e, ha'u ho ha'u-nia kolega Ana Paula ami rua hosi eskuteiru, agora daudauk nia kontinua nia estudu iha nasaun Fiji, wainhira Ana Paula ba tiha eskola iha rai-li’ur, ha'u hamutuk ho alin joven sira iha bairu Sarmata laran hodi kontinua no finaliza obra ne'e,” Filomena dehan.
Oras ne’e labarik ki'ik oan sira ne'ebé Filomena halibur iha fatin ne'e hamutuk na'in-5 ne’ebé kompostu hosi feto 4 no mane 1, maioria hosi suku Holarua postu-administrativu Same.
Labarik sira ne'ebé halibur iha fatin Mother Teresa Home Care iha Saramata ne'e, sira hala'o atividade regulár loro-loron mak hanesan ba eskola, atividade relijioza regulár reza iha tempu dadeer-saan, meiudia no kalan, estuda inklui atividade extra sira seluk.
Fonte: Diáriu "Roman ba Sosiedade" Manufahi