Dili, 03 Agostu 2023 - Visi ministru saúde, Flávio Brandão Mendes de Araújo, hateten katak Timor-Leste kontinua haruka pasiente ba halo tratamentu  iha nasaun seluk ho númeru ne'ebé mak bo'ot tanba menus fasilidade, maibé nia kompromete katak iha futuru sei hadia problema sira ne'ebé parte saúde hasoru, nune'e bele halo de'it tratamentu iha rai laran.

"Ita transfere kazu ba rai-liur, númeru bo'ot mak hanesan kankru, tumor, no fuan, agora ba oin ita sei kontinua haruka maibé, ita neneik-neneik hasa’e ita-nia kapasidade hodi halo diagnóstika [...] no intervensaun iha rai laran. Entaun [...] atu sedu ka tarde ita sei la haruka tán pasiente ba rai-liur", visi ministru saúde esplika.

Flávio hateten tan katak progressu ne'ebé di'ak mak pasiente ba fase raan la haruka ona ba rai-liur, no iha futuru sei halo mós tratamentu ba moras sira seluk iha rai laran hanesan kankru no fuan.