Dili, 11 Novembru 2021 – Ekipa Fiskalizasaun Konjunta (EFK) ba monitorizasaun viatura Estadu nian, liuhosi Pontu Fokál Komisaun Anti Korupsaun (KAK) Euclides Madeira, hato’o agradesimentu ba públiku tanba kontribui ona iha servisu monitorizasaun movimentu viatura Estadu iha loron Finadu foin lalais ne’e liuhosi hasai foto inklui halo vídiu ba viatura Estadu sira-nia movimentu no manda ba parte EFK.
“Ami hakarak hato’o obrigadu wa’in ba públiku tanba durante loron Finadu, públiku mós tulun EFK hodi deskobre movimentasaun viatura estadu durante loron Finadu liuhosi hasai fotografia, halo vídiu no haruka mai iha EFK nia númeru WA sira. Ho ida ne’e mak ami mós akumula hotu rezultadu hosi públiku haruka mai iha EFK, ho hakraik-an EFK hakarak agradese ba públiku no mós ba mídia sira,” Madeia informa, ohin (11/11), liuhosi konferénsia imprensa ne’ebé hala’o iha Vila-Verde, Dili.
Nia relata katak durante loron Finadu liubá, EFK deskobre kareta Estadu hamutuk 10 mak halo movimentu. Hosi 10 ne’e, kareta 5 hetan autorizasaun hosi ninia superiór ierárkiku no kareta 5 seluk sei prosesa tuir lei tanba la hetan autorizasaun.
Fonte: Timor News