Dili, 11 Outubru 2021 - Gabinete Apoiu Atividade Kónjuge Prezidente Repúblika (GAAK-PR) hala’o treinamentu ‘Hakbiit Negosiante’ hodi hasa’e negosiante feto sira-nia abilidade, durante loron rua iha suku Bikeli no loron rua mós iha suku Makadade, Ataúru, no hetan partisipante hamutuk na’in-56.
Treinamentu ne’e ninia objetivu prinsipál mak atu hasa’e no kapasita inan-feton sira kona-ba jestaun finansiamentu nune’e bele jere ho di’ak wainhira hala’o negósiu loro-loron nian hodi bele hatene kapitál ho lukru hira mak sira iha. Iha loron daruak hosi treinamentu ne’e partisipante sira mós aprende no simu treinamentu Kulinária kona-ba oinsá prepara ai-hán lokál ho di’ak nune’e bele utiliza produtu lokál ka materiál lokál nian maibé sabór furak atu bele dada ka atrai liután turizmu lokál no internasionál ba Ataúru.
Partisipante na’in-56 iha treinamentu ne’e mai hosi Uaruana, Fatu’u, Akrema no Makadade.
Komunidade iha suku Bikeli ho Makadade agradese ba Espoza PR ne’ebé ho inisativa hakbiit negosiante ki’ik liuhosi programa fó treinamentu nune’e bele hasa’e sira-nia kapasidade atu bele prepara ho di’ak liután sira-nia produtu kulinária iha Ataúru hodi simu turista lokál hosi fatin hotu-hotu ne'ebé sei ba vizita Ataúru.
Fonte: Gabinete de Apoio à Atividade do Cônjuge do Presidente da República (GAAC-PR).