Dili, 23 Fevereiru 2022 – Governu liuhosi Diresaun Nasionál Meteorolojia no Jeofízika (DNMG sigla portugés) Timor-Leste, alerta ba populasaun iha Timor-Leste katak ho kondisaun klimátika udan oras ne’e iha posibilidade atu hamosu tán kalamidade hanesan iha 04 Abril 2021 liubá.
“Possibilidade bele akontese tán hanesan eventu iha loron 04/04/2021. Ho nune’e husu nafatin komunidade sira atu nafatin tau atensaun ba dezastre sira ne’ebé ita hotu la espera, tanba atmosfera INSTÁVEL kuaze iha teritóriu Timor laran ne’ebé iha potensial atu akontese udan ho intensidade FRAKU-MODERADU no lokalmente bele FORTE LIU iha kualker momentu, akompaña anin ho velocidade NATON-FORTE iha kosta norte hosi Lautem, Baukau, Manatutu no Atauru […]. Iha posibilidade atu hamosu udan extremu,” DNMG alerta, ohin (24/2), liuhosi nia divulgasaun ofisiál.
DNMG akresenta, kondisaun tempu iha parte loro-kraik to’o kalan, previzaun tempu hatudu katak atmosfera sei kontinua instável ka kalohan kontinua taka no potensia atu udan ho intensidade husi fraku to’o moderadu iha teritóriu Timor laran, lokalmente bele forte liu prinsipalmente iha parte foho sira inklui mós Dili.
Fonte: DNMG Timor-Leste