Dili, 27 Abril 2022 – Governu liuhosi Ministru Finansa, Rui Augusto Gomes, ohin (27/4), aprezenta ona ba Parlamentu Nasionál (PN) ho karáter urjénsia, proposta Orsamentu Jerál Estadu (OJE) Retifikativu 2022 ho montante totál $1.129.857.250 (ka billaun $1.1), haktuir parte Governu ninia divulgasaun ofisiál.
Proposta OJE Retifikativu ne’e sei uza hodi finansia medida komplementár hamutuk sanulu-resin-tolu (13) ho ninia detalla mak hanesan tuir mai ne’e: i) Kriasaun Fundu Veteranu ho orsamentu alokadu billiaun $1; ii) Atribuisaun Pagamentu Désimu Terseiru $200 ba kada família ka uma-kain iha fulan Dezembru (exeptu funsionáriu públiku sira) ho orsamentu alokadu millaun $70; iii) Uma Kbiit Laek Plus ho orsamentu alokadu millaun $25; iv) Bolsa Estudu ba Mellór Graduadu Estudante Ensinu Báziku no Sekundáriu ho orsamentu alokadu millaun $7.5; v) Programa Mão de Obra ba postu-administrativu, millaun $7.2; vi) Revitaliza kafé no subsídiu ba kafé laku-teen ho orsamentu alokadu millaun $6,4; vii) Pagamentu ba diferensa remunerasaun PNTL nian ho rejime salariál foun, ba membru PNTL 4.096 ho orsamentu alokadu millaun $5.1; viii) Harii Sede Arte Marsiál no Rituál millaun $2.5; ix) Programa Eskola iha Uma ho orsamentu alokadu millaun $2.1; x) Internet gratuita iha eskola sira, millaun $1.1; xi) Subsídiu akomodasaun ba PNTL no F-FDTL ho orsamentu alokadu millaun $1.9; xii) Estabelesimentu Sekretaria ba Asuntu Traballadór iha rai-li’ur no Komunidade Timoroan iha Diáspora rihun $500; xiii) Empregu ba mellór alunu universitáriu sira rihun $437,5.
Ho Proposta Orsamentu Retifikativu ne’e siginifika Reseita Konsolidada Setór Públiku Administrativu sa’e ba $3.234.522.481, enkuantu Despesa Konsolidada Setór Públiku Administrativu sa’e ba $3.233.908.681. Reseita hosi Órgaun Servisu Administrasaun Sentrál sa’e ba $2.987.140.197, enkuantu Despesa Órgaun Servisu Administrasaun Sentrál sa’e ba $2.987.140.197, ne’ebé fahe tuir kategoria klasifikasaun ekonómiku.
Liuhusi Proposta Orsamentu Retifikativu ne’e, Governu propoin ba PN atu halo reforsu finanseiru ba iha títulu Dotasaun ba Governu tomak no kria Programa Foun hanaran Medida Orsamentu Komplementár. Ida ne’e Governu halo atu labele book ka muda estrutura orsamentu kada programa.
Fonte: Ministério das Finanças (MF)