Dili, 24 Setembru 2021 – Konsellu Ministru hala’o reuniaun ohin (24/9) iha Palásiu Governu, Dili, no deside hodi aprova votu pezár no aprova Rezolusaun ida ne’ebé dekreta lutu nasionál ba Eiz Komandante Forsa Armada Libertasaun Nasionál Timor-Leste (FALINTIL) Ma’Huno Bulerek Karathayano.
"Lutu nasionál ne’e iha teritóriu Timor-Leste ba períodu loron tolu, hahú hosi tuku 8:00 loron 25 fulan-Setembru. Durante períodu lutu nasionál, bandeira nasionál sei hasa’e to’o ai-riin klaran de’it (meia haste), iha nasaun laran tomak iha fatin sira ne’ebé mak obrigatóriu tenke uza, inklui iha misaun diplomátika sira," haktuir komunikadu ofisiál hosi Governu.
Ma’huno mós nu’dar mós Eiz Sekretáriu Komisaun Diretiva FRETILIN nian no atualmente Primeiru Vise Prezidente Partidu CNRT. Nia moris iha 14 Abríl 1949 no hakotu-iis ohin (24/9) iha HNGV, Dili.
Hafoin Eiz Komandante En Xefe FALINTIL Kay Rala Xanana Gusmão hetan kapturasaun, Ma’huno asume hikas pozisaun nu’udar Komandante FALINTIL hahú hosi 20 Novembru 1992 to’o 4 Abril 1993.
Fonte: Mídia Serviço Relações Públicas de Ministério do Interior