Dili, 22 Setembru 2021 – Governu deside ona atu kontinua renova implementasaun Estadu Emerjénsia (EE) ba dala-18 ba loron tolunulu (30) tán.
Desizaun ida ne’e Konsellu Ministru deside ona hafoin halo tiha análize ba aprezentasaun hosi Sala Situasaun Sentru Integradu Jestaun Krize (SS-SIJK) kona-ba situasaun pandemia iha Timor-Leste, iha reuniaun ne’ebé Konsellu Ministru hala’o ohin (22/9) iha Palásiu Governu, Dili.
Tanba ne’e, Konsellu Ministru propoin ba Prezidente Repúblika Francisco Guterres Lú Olo atu promulga renovasaun EE ba dala-18 ne’e tuir pedidu katak ba loron tolunulu tán.
Governu propoin ba PR atu dekreta renovasaun EE refere ho objetivu atu bele kontinua permite suspensaun ka restrisaun ba direitu no garantia fundamentál balu sidadaun sira nian hodi aplika medida sira ne’ebé atu kombate Covid-19.
Enkuantu implementasaun EE ba dala-17 nian ne’ebé hahú hosi 31 Agostu ne’e sei remata iha 29 Setembru 2021.
Fonte: Mídia Ministério Presidénsia do Conselho Ministro