Dili, 23 Outubru 2021 – Governu liuhosi Ministériu Administrasaun Estatál (MAE), Diresaun Jerál Dezenvolvimentu Rurál, deside ona katak sei la marka tán ona liafuan ‘Uma Kbiit-Laek’ iha uma sira ne’ebé konstrui ba ema kbiit-laek sira iha kada suku.
“Ministériu Administrasaun Estatál (MAE) liuhosi Diresaun Jerál Dezenvolvimentu Rurál deside ona ba oin sei la marka ‘Uma Kbiit-Laek’ iha Programa VIII Governu Harii Uma Dignu no Seguru ba Povu,” Governu informa iha nia divulgasaun ofisial ohin (23/10).
Parte Governu esplika katak desizaun ida ne’e nia objetivu mak atu komplementa prinsípiu ida hosi prinsípiu Boa Governasaun partisipasaun ativu ema hotu-hotu nian liuhosi aspirasaun ba desizaun públika.
“Nu'udar programa foun laiha desizaun ida mak absoluta tanba ne'e sujestaun ema hotu-hotu nian ba liafuan marka iha didin-lolon Uma Kbiít-Laek ne'ebé foin inagura! Ami deside liuhosi desizaun tékniku ho integradu no orientadu uniforma ba terenu liuhosi ekipa munisípiu, postu no ekipa implementadór programa kada suku sira ho uniforma ba oin sei la inklui iha dezeñu/LA MARKA,” parte Diresaun Jerál Dezenvolvimentu Rurál esplika.
Fonte: Mídia Gabinete do Primeiro-Ministro (GPM)