Dili, 16 Juñu 2021 – Konsellu Ministru hala’o sorumutuk ohin (16/6) iha Ministériu Finansa, Dili, no deside hodi la renova impozisaun konfinamentu domisiliáriu jerál ba populasaun iha munisípiu Dili.
“Konsellu Ministru deside ona hodi la renova impozisaun konfinamentu domisiliáriu jerál hosi populasaun munisípiu Dili nian,” temi iha komunikadu imprensa ofisiál hosi Governu.
Maibé, hafoin rona tiha aprezentasaun hosi Sentru Integradu Jestaun Krize (SIJK) kona-ba pontu situasaun epidemiolójika iha Timor-Leste, Konsellu Ministru kontinua aprova projetu Rezolusaun ida hodi mantéin impozisaun serka sanitária iha munisípiu haat hanesan Baukau, Bobonaru, Kovalima no iha Díli mós ba loron hitu (7) tán.
Tanba ne’e, ho impozisaun serka sanitária refere, bandu nafatin sirkulasaun ema sira nian entre munisípiu hirak ne’ebé temi ona iha leten, no sirkunskrisaun administrativa sira seluk, exetu iha kazu espesífiku hirak ho fundamentu forte.
Fonte: Mídia Ministério Presidénsia do Conselho Ministro