GOVERNU HAHÚ HADI’A PNTL NO F-FDTL NIA REJIME SALARIÁL
Dili, 07 Setembru 2021 – Ministru Defeza Filomeno Paixão de Jesus hala’o enkontru ho Vise Ministru Interiór Antonio Armindo hodi ko’alia kona-ba determinasaun atu dezenvolve no hadi’a membru Polísia Nasionál Timor-Leste (PNTL) no FALINTIL Forsa Defeza Timor-Leste (F-FDTL) sira-nia rejime salariál ho objetivu atu hametin instituisaun rua refere nune’e bele iha kbiit hodi hala’o mandatu tuir Konstituisaun.
“Ohin enkontru ho Ministru Defeza hodi ko’alia kona-ba armonizasaun ba rejime salariál ba instituisaun PNTL no F-FDTL nune’e ita bele hahú hadi’ak dadauk ona bem-estar membru instituisaun rua ne’e,” Vise Ministru Interiór informa ohin (07/9) iha edifísiu Ministériu Defeza, Fatuhada, Dili, hafoin remata enkontru.
Nia dehan, lei rejime salariál rua ne’e sei aprezenta iha tempu badak hafoin tékniku hosi instituisaun rua ne’e finaliza iha semana ida ne’e no sei lori ba Prezidénsia Konsellu Ministru.
“Povu ohin loron husu PNTL tenke hametin tán profisionalizmu nune’e bele hetan nafatin fiar hosi povu. Maibé ami hanesan polítiku mós tenke hadi’a uluk sira-nia bem-estar nune’e forsa seguransa rua nasaun ida ne’e bele halo nia misaun hodi garante seguransa ba povu tomak nune’e lori Estadu ne’e bele la’o ba oin,” António Armindo akresenta.
Vise Ministru ne’e husu mós ba membru PNTL tomak atu kontinua hadi’a-an hodi reprezenta Estadu iha fatin ne’ebé de’it, nune’e PNTL bele sai instituisaun ne’ebé kredível tebes.
Fonte: Mídia Serviço Relações Públicas de Ministério do Interior
