Dili, 10 Setembru 2021: Primeiru-Ministru Taur Matan Ruak lori Governu Timor-Leste nia naran hato’o profunda kondolénsia ba família, kolega no amigu hosi Eiz Prezidente Repúblika Portugál Jorge Fernando Branco de Sampaio ne’ebé fila hikas ona ba Maromak ohin (10/9) ho idade tinan 81.
“Ha’u lori VIII Governu Konstitusionál, no ha’u nia naran rasik no ha’u nia espoza, espresa profunda kondolénsia ba família, kolega no amigu Saudozu Eiz-Prezidente Repúblika Portugeza, Dr. Jorge Fernando Branco de Sampaio,” dehan Primeiru-Ministru Taur iha karta ne’ebé Timor News asesu ohin.
Iha karta ne’e dehan, Jorge Sampai nu’udar Prezidente ida ne’ebé kontibui tebes ba Restaurasaun Independénsia Nasionál Timor-Leste.
“Mundu sei kontinua lembra Eiz-Prezidente Jorge Sampaio nu’udar figura maiór ba kauza no liberdade no rekoñese nu’udar amigu boot Timor-Leste no timoroan nian,” dehan Taur iha karta ne’e.
Jorge Sampaio asume pasta nu’udar Prezidente Repúblika Portugál ho mandatu dala rua hahú hosi tinan 1996 to’o 2006.
Hafoin hetan deklarasaun katak povu Timor-Leste hili ukun rasik-an, Jorge Sampaio mai iha Timor-Leste ne’ebé simu direita hosi Eiz Líder Rezisténsia Xanana Gusmão iha tinan 2000.
Fonte: Mídia Gabinete do Primeiro-Ministro (GPM)